Algengustu tegundir haustlauka og blómgunartími

20. september 2025

Með því að velja saman mismunandi tegundir af haustlaukum með mismunandi blómgunartíma er hægt að njóta blómstrandi lauka frá mars-júlí og jafnvel fram á haust með hléum með síðblómstrandi skrautlaukum (Allium) og haustblómstrandi laukum eins og haustliljum (Colchicum).

Til þess að ná samfelldri blómgun á vormánuðum er gott að þekkja helstu tegundir haustlauka og hvenær þeirra blómaskeið er. Blómgunartíminn er breytilegur eftir staðsetningu og tíðarfari. Það getur munað 2-3 vikum milli ára eftir því hvernig viðrar, en blómgunarröðin er alltaf sú sama. Blómgun mismunandi tegunda skarast þannig að vetrargosar og vorblómstrandi írisir eru enn í blóma þegar fyrstu krókusar og snæstjörnur byrja að blómstra.

Ég veitti því eftirtekt þegar ég fór að velta fyrir mér blómaskeiðum sumarsins og hvaða plöntur eru að blómstra á svipuðum tíma að umskipti verða frekar í kringum 20. hvers mánaðar frekar en um mánaðarmót. Plönturnar fylgja sólarganginum, ekki dagatalinu. Það vill svo skemmtilega til að það gerðu gömlu íslensku mánuðirnir líka. Vorjafndægur eru í kringum 20. mars, um það leiti sem síðasti vetrarmánuðurinn, einmánuður, gengur í garð og það er einmitt um svipað leiti sem vetrargosar, vorírisir og fyrstu krókusarnir springa út þegar vel vorar og sólin skín.

Mars - apríl